Primu biàgiu
Annu: 1831
Posca de s’èssere laureadu, Giuanne Spano si fiat trasferidu a Roma pro aprufundire sa connoschèntzia de s’ebràicu e de sas limbas orientales. Aiat sighidu sas letziones de s’Archiginnàsiu intrende in cuntatu cun istudiosos e intelletuales de su tempus comente: su filòlogu e orientalista Michelangelo Lanci, s’archeòlogu Emiliano Sarti, su padre scolòpio Andrea Molza, dotzente de ebràicu e caldàico, e su retore de su collègiu inglesu e puru dotzente de ebràicu, Nicholas Patrick Stephen Wiseman.
Segundu viàgiu
Annu: 1834
Pustis de nch’àere coladu tres annos in Roma, fiat andadu a Torino e duncas a Casteddu in ue aiat otènnidu sa catedra de Iscritura Sacra in s’Universidade Règia. Su segundu biàgiu de Spano si cunfigurat comente unu biàgiu de torrada a sa terra nadia e su comintzu de unu perìodu ricu de chircas e publicatziones.
Su de tres biàgios
Annu: 1836-1837
Aende bisòngiu de s’istruire de prus in sa filològia, Giuanne Spano aiat pedidu a su Ministèriu de èssere esoneradu dae s’insignamentu e autorizadu a unu biàgiu nou. Comente contat isse matessi, fiat istadu longu (dae Torino a Napoli, dae Genova a Venezia) e profetosu meda pro sa mente e s’ànima ca aiat àpidu sa sorte de adobiare sos istudiosos prus mannos de su tempus suo e de visitare bibliotecas e giassos archeològicos.
Su de bator biàgios
Annu: 1839
Su 2 de trìulas de su 1839, Giuanne Spano aiat àpidu s’incàrrigu de Diretore de sa Biblioteca Universitària de Casteddu. Pensende de no èssere adecuadu a s’incàrrigu, aiat detzisu de andare a sas bibliotecas de prus importu de su Tzentru e de su Nord de Itàlia cun sa punna de imparare sas mègius protzeduras pro sa gestione, ma puru pro s’organizatzione e sa classificatzione de sos libros.
Su de chimbe biàgios
Annu: 1854
Numenadu Prèside de su Cunvitu Règiu e Diretore de su Collègiu de Santa Teresa, Giuanne Spano aiat detzisu de fàghere un’àteru biàgiu a Torino, Alessandria e Genova pro istudiare sos mètodos prus bonos de regulamentos in sos cunvitos natzionales diferentes.
Su de ses biàgios
Annu: 1856
Aiat detzisu de andare in Cartagine e in Sitzìlia. E cantu prus m’interessaiat de visitare cussa terra antiga, bidu chi mi podiat agiudare pro s’illustratzione de sos monumentos de sa Sardigna chi deo aia comintzadu a tratare in su "Bulletinu archeològicu". Fiat andadu a Napoli e Pompei pro istudiare sas cosas noas chi aiant agatadu. In Roma aiat visitadu sas catacumbas de Santu Callisto, agatadas dae pagu, acumpangiadu dae s’istudiadu cavalieri G. B. Derossi, chi nde fiat su diretore (Iniziazione ai miei Studi, 5.9). Aiat sighidu su biàgiu cara a Torino in ue aiat adobiadu Giuanne Lanza, ministru de s’Istrutzione Pùblica, a istare cun issu l’aiat agiudadu pro s’andanta bona de sos istùdios e pro sa connoschèntzia manna chi custu òmine de guvernu aiat de sas cosas e de sas pessones. (Introduida a sos Istùdios mios, 5.10)
Su de sete biàgios
Annu: 1862
Fiat andadu a Torino, Siena e Firenze in ue aiat adobiadu Nicolò Tommaseo (…). Onni die andaia a visitare custu òmine veneràbile; fiat tzegu ma bidiat cun sa mente. M’aiat dimandadu de sa limba e de sos dìcios de sos sardos, chi cunfrontaiat cun cussos italianos chi fiat acollende in su vocabolàriu chi fiat contivigiende! Aia visitadu s’iscritore chi non s’istracaiat mai, su sàbiu Atto Vannucci, cun su cale aia cuntatos medas pro sas cosas sardas, mentovadas in cussa òpera sua ispantosa Istòria de s’Itàlia antiga e su diretore de su Museu cavalieri Migliarini (cun su cale fiamus in cuntatu giai dae su 1840), chi aiat acraridu puru cosas medas de Sardigna chi deo l’aia fatu fatu ischire (Introduida a sos Istùdios mios, 6.6).
Su de oto biàgios
Annu: 1871
Ùrtimu biàgiu de su Canònicu, in ocasione de su de V Congressos preistòricos de Bologna, in ue su Spano aiat fatu a connòschere a su mundu sa tziviltade nuràgica e sos istùdios suos prus reghentes in matèria, giughende puru testimoniàntzias materiales.